guzre jo apne yaaron ki sohbat men chaar din

Guzre jo apne yaaron kee sohbat men chaar din Aisa lagaa basar hue jannat men chaar din Umr-e-khizar kee us ko tamannaa kabhi na ho Insaan jee sake jo mohabbat men chaar din Jab tak jiye nibhaa.enge ham un se dostee Apne rahe jo dost museebat men chaar din Ai jaan-e-aarzoo wo qayaamat se kam na the KaaTe tire baghair jo ghurbat men chaar din Phir umr bhar kabhi na sukoon paa sakaa ye dil KaTne the jo bhee kaT ga.e raahat men chaar din Jo faqr men suroor hai shaahee men wo kahaan Ham bhee rahe hain nashsha-e-daulat men chaar din Us aag ne jalaa ke ye dil raakh kar diyaa UThte the 'josh' sho.ale jo vahshat men chaar din