har mulaaqaat men lagte hain wo begaane se
— A G Josh
Har mulaaqaat men lagte hain wo begaane se
Faa.eda kya hai bhalaa aison ke yaaraane se
Kuch jo samjhaa to mujhe sab ne hee aashiq samjhaa
Baat ye khuub nikaalee mire afsaane se
Zindagee apnee nazar aane lagee sirf saraab
Kabhi guzre jo dil-e-zaar ke veeraane se
Ek pal bhee na Thahar paaoge ai sang-zano
Koi patthar kabhi lauT aayaa jo deevaane se
Tum ko marnaa hai to marnaa mire gul hone par
Sham.a kahtee rahi shab-bhar yahee parvaane se
Phir na dekhaa tujhe ai 'josh' sukoon se baiThaa
Jab se uTThaa hai too is shokh ke kaashaane se