na sochnaa ki zamaane se dar gae ham bhi

Na sochnaa ki zamaane se Dar ga.e ham bhee Tiree talaash men ghairon ke ghar ga.e ham bhee Churaa liin ham se bhee us khud-parast ne aankhen Dil-e-habeeb se aakhir agar ga.e ham bhee Paseejaa dil na kisee kaa hamaare ashkon se Har aastaan pe liye chashm-e-tar ga.e ham bhee Jo dekhaa kaliyon ko tujh par nisaar hote hue To rang ban ke fazaa men bikhar ga.e ham bhee Jab us kee zauq-e-nazar kaa huaa bahut charchaa Vufoor-e-shauq se ek din sanvar ga.e ham bhee Bahut se ishq kee raahon men pul-siraat aa.e Tumhaaraa naam liyaa aur guzar ga.e ham bhee Muhaal thaa ki ham ai 'josh' zinda rah sakte Firaaq-e-yaar men ik roz mar ga.e ham bhee