ashk umden to unhen palkon pe rokaa jaae

Ashk umDen to unhen palkon pe rokaa jaa.e Kyon ye pindaar-e-wafa soorat-e-girya jaa.e Jab se dekhe hain tiree aankhon ke saagar ham ne Ik na.ee aarzoo ubhree hai ki Duubaa jaa.e Main samaa.at men sameTe hoon hazaaron dushnaam Zabt-e-gham kaa hai ye irshaad na bolaa jaa.e Ham ko is khvaab-e-mohabbat se jagaayaa kis ne Naqsh chehron pe adaavat kaa na dekhaa jaa.e Zakhm-khurda na kaheen ungliyaan vahshat ho jaa.en Barbat-e-dil ko kisee ke na yuun chheDaa jaa.e Dil hai masloob-e-anaa baam pe sooraj bhee nahin Kis tarah ghar ke andheron ko ujaalaa jaa.e Paanv jab khaar-e-mugheelaan se hain chhalnee 'aabid' Kyon na phir aatish-e-namrood men utraa jaa.e