dard ki aanch men jaltaa hai ye ghar kya kiije
— Aabid Jafri
Dard kee aanch men jaltaa hai ye ghar kya kiije
Khvaab hotee hai tamanna kee sahar kya kiije
Ham bhee maanoos nahin dil ke andheron se abhee
Taa.er-e-shab bhee hai khole hue par kya kiije
Duur manzil hai kaDee dhoop men karnaa hai safar
KaT ga.e raah men jitne the shajar kya kiije
Wo ga.e waqt kee maanind na lauTegaa kabhi
Ab luTaa kar ye vafaaon ke guhar kya kiije
Be-gavaahee ke bhanvar men hai miree zaat ki ab
Aankh kee jhiil bhee hotee nahin tar kya kiije
Baarish-e-sang to be-vaj.h nahin hai 'aabid'
Aa gaya mujh ko vafaaon kaa hunar kya kiije