fikr rakhte hain kahaan zehn agar rakhte hain

Fikr rakhte hain kahaan zehn agar rakhte hain Dasht-e-be-aab men jo tukhm-e-hunar rakhte hain Har na.ee baat bhulaa detee hai pahle kaa khayaal Wo to akhbaar hain bas taaza khabar rakhte hain MiT gaya rang-e-ta.alluq to ye chehre ke nuqoosh Ek ik khatt-e-ta.assur men khabar rakhte hain Aise logon kaa milaa ham ko zamaana jo log Kor-beenaa hain magar ham pe nazar rakhte hain Koi aahaT hai na dastak ki bichhaD jaa.e sukoot Jin ko deevaar mayassar ho wo dar rakhte hain Jab bhee aatee hai kisee samt se maqtal kee havaa Dhyaan aataa hai abhee dosh pe sar rakhte hain