pahlii sii dil ko khwaish e hijrat nahin rahii
— Aabid Jafri
Pahlee see dil ko khwaish-e-hijrat nahin rahi
Kya ai zameen hamaaree zaroorat nahin rahi
Aangan men saaree raat barastee rahi ghaTaa
Deevaar ghar kee koi salaamat nahin rahi
Yunhee nahin iraada-e-pahloo-tahee ki ab
Un se nibaah karne kee soorat nahin rahi
Patte hain khushk phir bhee shajar se hain munsalik
Kya keejiye havaa kee inaayat nahin rahi
Dariya men laakh maujen raheen sar-ba-kaf magar
Kachche gharon ko ab koi vahshat nahin rahi
Galiyon men phir se farsh-e-lahoo bichh gaya tamaam
Insaan men aaj-kal ke sharaafat nahin rahi