shikve hamen to jehd e mukarrar ke nahin hain
— Aabid Jafri
Shikve hamen to jehd-e-mukarrar ke nahin hain
Hijrat huee hai yuun ki kisee ghar ke nahin hain
Kis jurm men ye pahloo-tahee ham se ravaa hai
Ai sheesha-garo ham koi patthar ke nahin hain
Sar-basta-e-zanjeer kiyaa ham ko jinhon ne
Wo log usee ghar ke hain baahar ke nahin hain
Kis darja mukarram hain mire ashk na poochho
Wo daam mile hain ki jo gauhar ke nahin hain
Wo dard sahaa hai ki jo ghairon kaa nahin thaa
Wo zakhm lage hain ki jo khanjar ke nahin hain