yahii to ek shikaayat safar men rahtii hai

Yahee to ek shikaayat safar men rahtee hai Havaa-e-gard musalsal nazar men rahtee hai Jazaa-e-kaavish-e-ta.ameer ye milee hai hamen Sadaa-e-tesha sadaa saath ghar men rahtee hai Hunar kisee men ho qismat hai us kee dar-badaree Ki aab-o-taab-e-guhar kab guhar men rahtee hai Samaa.aton kaa payambar hee ban sake to sune Wo daastaan jo lab-e-chashm-e-tar men rahtee hai Har ek sub.h pe maqtal kaa ho raha hai gumaan Na jaane kaun see surkhee khabar men rahtee hai