mujh aise shakhs ki haajat ravaaii karte hue

Mujh aise shakhs kee haajat-ravaa.ee karte hue BhaTak gaya tha wo kaar-e-khudaai karte hue Ki baaton baaton men manzil se duur le gaya tha Wo naa-khuda-e-sukhan rahnumaa.ee karte hue Abhee hai vaise kaa vaisaa hee haal andar kaa Ki umr Dhal ga.ee dil kee safaa.ee karte hue Nisaab-e-ishq abhee tak hai maavaraa-e-khirad Ki tiis saal hue hain paDhaa.ee karte hue Halaal luqma khilaanaa hai apne bachchon ko Hamesha soch ye rakkhee kamaa.ee karte hue Wo khel baiThaa mohabbat se phir mohabbat ne Javaabee vaar kiyaa kaaravaa.ee karte hue Na koi dukh kaa ta.assur na thee pashemaanee Malaal tak na huaa bevafaa.ee karte hue Diyaa palaT ke sahaaraa sisaktee beTee ne Ki baap girne lagaa tha vidaa.ee karte hue TaDap ke rakh diye aankhon pe meree haath us ne Main zakhm dekh raha tha silaa.ee karte hue Jo mo'atabar gine jaate the wo bhee paa.e ga.e Ghalat jagah pe ghalat ham-navaa.ee karte hue Khuloos raas na aayaa 'umar' ki jo bhee milaa Daghaa hee deta gaya bhaa.ee bhaa.ee karte hue