aisa lamha udhaar de koi
— Aadarsh Dubey
Aisa lamha udhaar de koi
Jis men sadiyaan guzaar de koi
Baad muddat ke khat likhe wo mujhe
Aur kabootar ko maar de koi
Ye jo sardaar ban ke baiThaa hai
Us kee pagDee utaar de koi
Mast rakkhe jo hosh men bhee mujhe
Ab to aisa khumaar de koi
Kya khabar haadsaatee dunya men
Kab kahaan mujh ko maar de koi
Ek va.ada ki jis ke saa.e men
Umr saaree guzaar de koi
Dasht ko ghar banaa ke baiThaa hoon
Is ko aa kar sanvaar de koi