gunaah apne ginaataa hoon darne lagtaa hoon
— Aadarsh Dubey
Gunaah apne ginaataa hoon Darne lagtaa hoon
Khuda ke saamne jaataa hoon Darne lagtaa hoon
Kuch itnaa khaufzada hoon main apne kamre men
Koi charaagh jalaataa hoon Darne lagtaa hoon
Ab is maqaam pe pahunchee hai meree tanhaa.ee
Qareeb khud ke bhee jaataa hoon Darne lagtaa hoon
Qareeb dekh ke mujh ko lipaT na jaa.e kaheen
Main us kee bazm men jaataa hoon Darne lagtaa hoon
Kaheen wo jaan na le mere dil kee haalat ko
Kisee ko she'r sunaataa hoon Darne lagtaa hoon