jahaan sharaab kaa main ne gilaas dekhaa hai
— Aadil Aseer Dehlvi
Jahaan sharaab kaa main ne gilaas dekhaa hai
Gham-e-hayaat tujhe bad-havaas dekhaa hai
Jo inkisaar hai meraa hijaab-aalooda
Tire ghuroor ko bhee be-libaas dekhaa hai
Kisee amiir kaa kaif-o-suroor yaad aayaa
Kisee ghareeb ko jab bhee udaas dekhaa hai
Hamen fareb diyaa hai us aadmee ne zaroor
Jise zaraa saa bhee chehra-shanaas dekhaa hai
Miree hayaat se vaaqif nahin qalam meraa
Ki shaa'iree ne faqat iqtibaas dekhaa hai