mere jiine ki sazaa ho jaise
— Aadil Aseer Dehlvi
Mere jiine kee sazaa ho jaise
Zindagee ek khataa ho jaise
Dil ke gulshan se guzar jaatee hai
Yaad ik baad-e-sabaa ho jaise
Yuun khayaalon men chale aate ho
Koi paaband-e-wafa ho jaise
Yaad hai tujh se bichhaDne kaa samaan
Shaakh se phuul judaa ho jaise
Apnee baaton pe gumaan hota hai
Too ne Kuch mujh se kahaa ho jaise
Us se mil kar huaa mahsoos 'aseer'
Wo mire saath raha ho jaise