kabhi sukuun kabhi ham ghutan ki nazr hue
— Aadil Farhat
Kabhi sukoon kabhi ham ghuTan kee nazr hue
Ham aise log to apne hee man kee nazr hue
Puraane ishq kee choTen abhee badan par thiin
So ishq chhoD diyaa aur badan kee nazr hue
Tamaam umr guzaaree hai sher kahne men
Hamaare raat bhee din bhee sukhan kee nazr hue
Ye kis ke Khoon se rangee ga.ee hain deevaaren
Ye kis ke khvaab the jo is chaman kee nazr hue
Nazar uThaa ke jo dekhaa palak jhapakne lagee
Tumhaaree diid ke manzar kiran kee nazr hue
Hamaaree ishq se 'farhat' kabhi banee hee nahin
Bas us kee baat rakhee aur milan kee nazr hue