khud udaasii men to apnii ye kamii rakkhii hai
— Aadil Farhat
Khud udaasee men to apnee ye kamee rakkhee hai
Saath jab tak hai wo chehre pe hansee rakkhee hai
Wo kabhi sookhte peDon ko to paanee degaa
Main ne is vaaste ik Tahnee haree rakkhee hai
Waqt se baDh ke aziyyat hee nahin dunya men
Jaane kis vaaste allah ne ghaDee rakkhee hai
Jo udaasee kee zaroorat ho to mujh se kahnaa
Mere haathon kee lakeeron men jhaDee rakkhee hai
Kitne hee saanp yahaan aa ke paDe rahte hain
Is liye aasteen dil se bhee baDee rakkhee hai