tere pyaason ko sazaa dii gaii hai
— Aadil Farhat
Tere pyaason ko sazaa dee ga.ee hai
Tishnagee aur baDhaa dee ga.ee hai
Us ke aane kee khabar aate hee
Shahr ko aag lagaa dee ga.ee hai
Qaid hone kee duaa maangee thee
Meree zanjeer haTaa dee ga.ee hai
Tum mujhe dekhne se qaasir the
Raushnee aur baDhaa dee ga.ee hai
Ek panchi ko kisee pinjre men
Udhte rehne kee duaa dee ga.ee hai
Khud-kushee ke to nishaan baaqee nahin
Ret saahil se haTaa dee ga.ee hai
Main to sajde men paDaa thaa lekin
Mujh pe talvaar giraa dee ga.ee hai