apnii aankhon se tabaahii ye nazaara dekhuun
— Aadil Rahi
Apnee aankhon se tabaahee ye nazaara dekhoon
Yaa'nee tujh ko main kisee aur kaa hota dekhoon
Meree deevaangee is moD pe le aa.ee hai
Har kisee chehre men bas ek hee chehra dekhoon
Ye jo tasveer musavvir ne banaa.ee varna
Chaand ko Thahre hue paanee men chaltaa dekhoon
Tishnagee laakh sahee par ye nahin ho saktaa
Khud ko laachaar banaa.oon soo-e-Dariya dekhoon
Ye tiree zid ki taDaptaa huaa dekhe mujh ko
Meree khwaish ki hamesha tujhe hanstaa dekhoon
Saamne tujh ko biThaa.oon tiraa maathaa choomoon
Teree aankhen tiree zulfen tiraa chehra dekhoon
Do qadam chal ke ye dil ne kahaa 'aadil-raahee'
Aakhiree baar palaT kar use jaataa dekhoon