gard jam jaae to shiisha nahin dekhaa jaataa
— Aadil Rahi
Gard jam jaa.e to sheesha nahin dekhaa jaataa
Ya.anee tasveer ko dhundlaa nahin dekhaa jaataa
Tishnagee aa tujhe Dariya ke havaale kar duun
Tujh ko is haal men pyaasaa nahin dekhaa jaataa
Tum miraa naam-o-nasab poochh rahe ho sab se
Ishq ho jaa.e to shajara nahin dekhaa jaataa
LauT aane kee tasallee tiree jhooTee hee sahee
Ab to muD-muD ke yuun rasta nahin dekhaa jaataa
Sher achchhe jo bure lagte hain Dunya ko mire
Ho ghazal men tiraa charchaa nahin dekhaa jaataa
Log milte hain bichhaDte hain magar kyon mujh se
Yuun tiraa chhoD ke jaanaa nahin dekhaa jaataa
Izz-o-tauqeer kaa ye haal hasad men ham se
Qad kisee kaa bhee ho oonchaa nahin dekhaa jaataa