hijr kaa sog manaanaa kabhi Dariya ronaa
— Aadil Rahi
Hijr kaa sog manaanaa kabhi Dariya ronaa
Yaad kar ke tujhe hansnaa kabhi ronaa ronaa
Kya bataa.oon use kis baat pe hanste dekhaa
Kya bataa.oon mujhe kis baat pe aaya ronaa
Kaise bhooloongaa wo bebaak adaa.en us kee
Us kee baaten to wo hansnaa wo lipaTnaa ronaa
Baat auron kee nahin too to miraa apna thaa
Kaash tujh ko nazar aataa mire dil kaa ronaa
Koi to baat use itnaa rulaatee hogee
Achchhaa lagtaa hai kise Toot ke tanhaa ronaa
Tum to khush the na mujhe chhoD ke jaate-jaate
Vaqt-e-rukhsat tumhen kis baat pe aaya ronaa
Muddaton baad ye ehsaas huaa hai 'raahee'
Muddaton baad phir aaya mujhe itnaa ronaa