jise ham kah saken apna koi aisa nahin miltaa
— Aadil Rahi
Jise ham kah saken apna koi aisa nahin miltaa
Tire hamnaam milte hain koi tujh saa nahin miltaa
Mohabbat ke safar men hain musaafir ham musaafir tum
Hamen manzil nahin miltee tumhen rasta nahin miltaa
Kisee kee rukhsatee ke baad tanhaa.ee ke aalam men
Ghamon kaa saath hota hai koi tanhaa nahin miltaa
Samajh lenaa koi maqsad hai us kee chaaploosee men
Jhukaa kar sar koi ikhlaas se itnaa nahin miltaa
Jidhar dekho udhar sach bolne vaale hee milte hain
Ta.ajjub hai koi is daur men jhooTaa nahin miltaa
Talab hai raushnee kee to jalaao khud diyaa 'raahee'
Bujhaane tishnagee pyaase kee to Dariya nahin miltaa