main na kahtaa thaa mire yaar badal jaataa hai
— Aadil Rahi
Main na kahtaa thaa mire yaar badal jaataa hai
Vaqt kitnaa bhee ho dushvaar badal jaataa hai
Main ne bas dil kee sunee varna tire baare men
Log kahte the khabar-daar badal jaataa hai
Haakim-e-vaqt yuun maghroor na ban hosh men aa
Piir aataa hai to itvaar badal jaataa hai
Tujh pe kaise ho yaqeen mujh ko ki ab too yaksar
Apna kahtaa to hai har baar badal jaataa hai
Ye nazaakat ye dikhaavaa ye takabbur achchhaa
Yaa'nee daulat se bhee me'yaar badal jaataa hai
Dekhne vaalo haqaarat se na dekho mujh ko
Bhuuk se jism kaa aakaar badal jaataa hai
Kya bataa.oon ki mohabbat ke safar men 'raahee'
Gham to rah jaataa hai gham-khvaar badal jaataa hai