use tum se mohabbat hai galat fahmii men mat rahnaa
— Aadil Rahi
Use tum se mohabbat hai ghalat-fahmee men mat rahnaa
Ye bas dil kee sharaarat hai ghalat-fahmee men mat rahnaa
Tumhee ko dekh kar wo muskuraataa hai to hairat kya
Use hansne kee 'aadat hai ghalat-fahmee men mat rahnaa
Hue barbaad to ab aah-o-zaaree kar rahe ho tum
Kahaa bhee thaa siyaasat hai ghalat-fahmee men mat rahnaa
Main tujh ko chaahtaa hoon baat ye sach hai magar phir bhee
Mujhe teree zaroorat hai ghalat-fahmee men mat rahnaa hee
Jhukee nazron se taknaa aur khamoshee se guzar jaanaa
Mohabbat kee rivaayat hai ghalat-fahmee men mat rahnaa
Kiyaa kartaa hoon 'raahee' us kee taa'reefen sabab ye hai
Wo mujh se khoobsoorat hai ghalat-fahmee men mat rahnaa