ek ik lamhe ko palkon pe sajaataa huaa ghar
— Aadil Raza Mansoori
Ek ik lamhe ko palkon pe sajaataa huaa ghar
Raas aataa hai kise hijr manaataa huaa ghar
Khvaab ke khadshe se ab niind uDee jaatee hai
Main ne dekhaa hai use chhoD ke jaataa huaa ghar
Gar zabaan hotee to patthar hee bataataa sab ko
Kis qadar TuuTaa hai wo khud ko banaataa huaa ghar
Us kaa ab zikr na kar chhoD ke jaane vaale
Too ne dekhaa hee kahaan ashk bahaataa huaa ghar
Ab use yaad kahoon yaas kahoon yaa vahshat
Mujh ko aataa hai nazar khaak uDaataa huaa ghar
Thak gaya kya mire toolaanee safar se 'aadil'
So gaya saath mire mujh ko sulaataa huaa ghar