raaste sikhaate hain kis se kya alag rakhnaa
— Aadil Raza Mansoori
Raaste sikhaate hain kis se kya alag rakhnaa
Manzilen alag rakhnaa qaafila alag rakhnaa
Ba.ad ek muddat ke lauT kar wo aayaa hai
Aaj to kahaanee se haadisa alag rakhnaa
Jis se ham ne seekhaa thaa saath saath chalnaa hai
Ab vahee bataataa hai naqsh-e-paa alag rakhnaa
Kooza-gar ne jaane kyuun aadmee banaayaa hai
Us ko sab khilaunon se tum zaraa alag rakhnaa
LauT kar to aa.e ho tajrabon kee soorat hai
Par miree kahaanee se falsafa alag rakhnaa
Tum to khuub vaaqif ho ab tumhee bataao naa
Kis men kya milaanaa hai kis se kya alag rakhnaa
Khvaahishon kaa khamyaaza khvaab kyuun bharen 'aadil'
Aaj meree aankhon se rat-jagaa alag rakhnaa