dil men aaseb e tamanna ko chhupaane vaale

Dil men aaseb-e-tamanna ko chhupaane vaale Saath men ro le kabhi mujh ko rulaane vaale Laakh taa'veez bandhe khuub du'aa.en maangeen Magar aa.e hee nahin lauT ke aane vaale Kya guzartee hai mire dil pe judaa.ee men tiree Tujh ko ehsaas bhee hai chhoD ke jaane vaale Yaad aate hain to aate hee chale jaate hain Dil se jaate hee nahin dil ko dukhaane vaale 'umr bhar DhoonDte phirte rahe qadmon ke nishaan Mere qadmon se qadam apne milaane vaale Zindagee too ne hamen chain se jiine na diyaa Ab nahin ham bhee tire naaz uThaane vaale Meree taqdeer faqat too hee badal saktaa hai Meree taqdeer badal Dunya banaane vaale Dekho kis tarh badal jaa.egaa ye vaqt kaa khel Khud bhee gir jaa.enge auron ko giraane vaale Doobnaa in kaa muqaddar thaa so Duube varna Tair bhee sakte the ye kashtee banaane vaale