is liye aate hain sailaab mirii aankhon men
— Aafreen Faheem Aafi
Is liye aate hain sailaab miree aankhon men
Jaagte rahte hain Kuch khvaab miree aankhon men
Ye mohabbat ke baDe khaas sabaq hote hain
Tum ne dekhe hain jo aadaab miree aankhon men
Main wo sahraa jahaan ummeed nahin baarish kee
Doobte jaate hain sairaab miree aankhon men
Us kee yaad aa.e to aankhon se ravaan ho jaa.en
Aaj Kuch ashk hain betaab miree aankhon men
Ik taraf ghoomtee Dunya kaa har ik manzar hai
Ik taraf chehra-e-naayaab miree aankhon men
Bhej do 'aafee' tabassum kee koi taaza khizaan
Zakhm hone lage shaadaab miree aankhon men