but e guncha dahan pe nisaar hoon main nahin jhuut kuch is men khuda ki qasam

But-e-ghuncha-dahan pe nisaar hoon main nahin jhuuT kuch is men khuda kee qasam Miraa taa.ir-e-dil isee qaid men hai mujhe zulf ke daam-e-balaa kee qasam Nahin bhaataa mujhe koi rashk-e-paree koi laakh haseen ho balaa se miree Miraa dil tiraa aashiq-e-shefta hai mujhe tere hee naaz-o-adaa kee qasam Mire dil ko zaraa nahin taab-o-ta.ab ki uThaa.oon tumhaaraa ye qahr-o-ghazab Mire qatl men der na chaahiye ab tumhen apne hee jaur-o-jafaa kee qasam Na to huur hee ko ye milaa hai namak na paree hee ke rukh men hai aisi chamak Tire saamne pheeke hain shams-o-qamar mujhe tire hee rukh kee ziyaa kee qasam Mujhe itr-e-hinaa kee nahin hai havaa mujhe phoolon se hota hai daagh-e-sivaa Kabhi nik.hat-e-zulf sunghaa de sabaa tujhe naafa-e-mushk-e-khataa kee qasam Mire ba.ad sahegaa na koi bhee gham na uThegaa kisee se ye ranj-o-alam Karo tark tum aaj se zulm-o-sitam tumhen apnee hee mehr-o-wafa kee qasam Kabhi dard se rotaa ho 'aaghaa' agar to hansee se ye kahtaa hai wo gul-e-tar Miraa maan kahaa are naala na kar tujhe bulbul-e-naghma-saraa kee qasam