dil men tire ai nigaar kya hai
— Aagha Akbarabadi
Dil men tire ai nigaar kya hai
Hota nahin ham-kanaar kya hai
Aayaa jo dam wo hai ghaneemat
Is ziist kaa aitbaar kya hai
Hain seb se bhee wo chhaatiyaan sakht
Aage un ke anaar kya hai
Dunya ke ye sab Dhakosle hain
Turbat kaisee mazaar kya hai
Taa.oos se chheD-chhaaD kaisee
Haan ai dil-e-daagh-daar kya hai
Jo jo wo ranj den uThaao
Jab dil hee diyaa to aar kya hai
Main chaahtaa hoon use na chaahoon
Dil par miraa ikhtiyaar kya hai
Mizhgaan kaa hai mere dil men khaTkaa
Ai khushboo-e-nok-e-khaar kya hai
MiTTee miree khaak men milaa.ee
Mujh se un ko ghubaar kya hai
DauDoon to mujhe sabaa na paa.e
Paidal kaisaa savaar kya hai
Bose kee talab ki vasl kaa zikr
Farmaa.iye naagavaar kya hai
Hai kya 'aaghaa' taDap raha hai
Kyuun kahte ho baar baar kya hai