maddaah hoon main dil se mohammad ki aal kaa

Maddaah hoon main dil se mohammad kee aal kaa Mushtaaq hoon vasee-e-nabee ke jamaal kaa Khvaahaan guhar kaa hoon na main taalib hoon laal kaa Mushtaaq hoon tumhaare dahan ke ugaal kaa Dekho to ek jaa pe Thahartee nahin nazar Lapkaa paDaa hai aankh ko kya dekh-bhaal kaa Kya un se faiz pahunche jo khud teera-bakht hain Khilte na dekhaa ham ne kabhi phuul Dhaal kaa Ham hain faqeer daulat-e-Dunya se kaam kya Behtar hai jaam-e-jam se piyaala sifaal kaa Daana dikhaa ke daam men 'anqaa ko laa.oongaa Mazmoon likh raha hoon tire khat-o-khaal kaa Sau jaan se fidaa hoon mohammad ke naam par Jis ne bataayaa farq haraam o halaal kaa Wo aankh bhee uThaa ke hamen dekhte nahin Rutba pahunch gaya hai ye ranj-o-malaal kaa Kis zindagee ke vaaste daulat kee aarzoo Dekho nateeja ghaur se qaaroon ke maal kaa Iqbaal gar nahin hai too inkaar keejiye Kuch deejiye javaab hamaare savaal kaa MuTThee ko khol kar yad-e-baizaa dikhaate hain Naakhun pe un ke hota hai dhokaa hilaal kaa Shaa'ir ghazab ke hote hain hargiz na chookte Mauqa' nahin dahan men tire qeel-o-qaal kaa Ai rashk-e-mehr vasl men ghussa hai kis liye Ye vaqt meree jaan nahin hai jalaal kaa Taareekee-e-lahad se Kuch 'aaghaa' na khauf kar Daaman hai tere haath men zahraa ke laal kaa