nigaahon men iqraar saare hue hain
— Aagha Akbarabadi
Nigaahon men iqraar saare hue hain
Ham un ke hue wo hamaare hue hain
Jin aankhon men aansoo chakaare hue hain
Ham un kee nigaahon ke maare hue hain
Na khaTken kaho kis tarah teer-e-mizhgaan
Jigar par hamaare utaare hue hain
JhaDe jo tiree kafsh-e-zarreen ke zarre
Falak par wo jaa kar sayyaare hue hain
'abas jaan detee hai bulbul gulon par
Ye us rukh ke sadqe utaare hue hain
Kis andaaz se band-e-mahram kase hain
Ki joban ko un ke ubhaare hue hain
Yaqeen hai balaa ho koi aaj naazil
Wo baalon ko apne sanvaare hue hain
Khabar-daar haathon se jaane na paa.en
Ye duzd-e-hinaa maal maare hue hain
Kahe detee hain saaf aankhen tumhaaree
Kisee ghair se Kuch ishaare hue hain
Main manjdhaar men Doobtaa hoon ilaahee
Wo dil le ke meraa kinaare hue hain
Hamesha jo bharte the dam dostee kaa
Vahee dushman-e-jaan hamaare hue hain
Nazar kar du'aa par khudaavand-e-aalam
Ki ham haath apne pasaare hue hain
Bhalaa ghair kee is men hai kya shikaayat
Vahee dushman-e-jaan hamaare hue hain
Unhen ham ne nahlaa diyaa de ke chheenTen
'ajab lutf Dariya kinaare hue hain
Khabar aamad-e-gul kee shaayad hai 'aaghaa'
Chaman saare jhaaDe bahaare hue hain