paanv phir hovenge aur dasht e mugiilaan hogaa
— Aagha Akbarabadi
Paanv phir hovenge aur dasht-e-mugheelaan hogaa
Haath phir hovenge aur apna garebaan hogaa
Dil-e-vahshee too na kar ishq pareshaan hogaa
Misl aa.eena ke phir shashdar-o-hairaan hogaa
Gar yahee ishq kaa aaghaaz hai to sun lenaa
Laash hovegee miree koocha-e-jaanaan hogaa
Doob kar marne kaa shauq us se hee poochh ai qaatil
Jis ne dekhaa ye tiraa chaah-e-zanakhdaan hogaa
Kahtee thee daam men sayyaad ke ro kar bulbul
Ab kabhi ham ko mayassar na gulistaan hogaa
Jitne Dunya men sitam chaahe too kar le mujh par
Hashr men haath miraa teraa garebaan hogaa
Jaan de baiThegaa ik roz too us par 'aaghaa'
Wo nahin haal kaa tere kabhi pursaan hogaa