sikka e daag e junoon milte jo daulat maangtaa

Sikka-e-daagh-e-junoon milte jo daulat maangtaa Tang kartee muflisee gar main faraaghat maangtaa Ranj se fursat na miltee main jo raahat maangtaa Bojh hota sar pe gar qaaroon kee daulat maangtaa Gar mujhe hotee khabar meraa maseehaa aa.egaa Ai ajal ik dam kee main bhee tujh se mohlat maangtaa Khizr kee see zindagee hotee jo mujh naakaam kee Main duaa-e-vasl-e-jaanaan taa-qayaamat maangtaa Ashk ke Dariya ne rakh lee aabroo ai chashm-e-tar Marte dam do gaz zameen kya bahr-e-turbat maangtaa Kis kee aamad aamad apne kalba-e-ahzaan men hai Peshvaa.ee ko hai dil pahloo se rukhsat maangtaa Dar-guzartaa jaan tak kartaa zameen us se aziiz Mujh se darbaan-e-dar-e-jaanaan jo rishvat maangtaa Naza.a tak deedaar kee hasrat rahi mushtaaq ko Ai maseehaa mar gaya beemaar sharbat maangtaa Dar-ba-dar phirne ne meree qadr khoee ai falak Un ke dil men hai jagah miltee jo khalvat maangtaa Minnaten kar ke chhuDaataa bulbulon ko daam se Main zar-e-gul deta agar sayyaad qeemat maangtaa Aadamiyyat se hain duur in zaahidon ke qaul-o-fe.al Haqq-e-mauroosee tha meraa kyuun main jannat maangtaa Jaan dee naahaq ko makkaara ke dam men aan kar Kohkan sheereen se mehnat kee jo ujrat maangtaa Qasd kartaa gar bulandee kaa to pastee dekhtaa Kund ho jaatee tabee.at gar main jaudat maangtaa Zulf ke janjaal men phansne kee khud kartaa duaa Main siDee tha jo khuda se apnee shaamat maangtaa Qaa.el apnee guftugoo se khaas kaa hota kaleem 'sa.adee'-e-sheeraaz bhee mujh se fasaahat maangtaa Yaar hota baagh hota aise gar hote naseeb Mai-kashee kee mohtasib se main ijaazat maangtaa Dasht-e-vahshat-khez men uryaan hai 'aaghaa' aap hee Qaasid-e-jaanaan ko kya deta jo khil.at maangtaa