aaj phir ruuh men ik barq sii lahraatii hai
— Abdul Hamid Adam
Aaj phir ruuh men ik barq see lahraatee hai
Dil kee gahraa.ee se rone kee sadaa aatee hai
Yuun chaTaktee hain kharaabaat men jaise kaliyaan
Tishnagee saaghar-e-labrez se Takraatee hai
Shola-e-gham kee lapak aur miraa naazuk saa mizaaj
Mujh ko fitrat ke ravayye pe hansee aatee hai
Maut ik amr-e-musallam hai to phir ai saaqee
Ruuh kyuun ziist ke aalaam se ghabraatee hai
So bhee jaa ai dil-e-majrooh bahut raat ga.ee
Ab to rah rah ke sitaaron ko bhee niind aatee hai
Aur to dil ko nahin hai koi takleef 'adam'
Haan zaraa nabz kisee vaqt Thahar jaatee hai