dil hai badii khushii se ise paaemaal kar
— Abdul Hamid Adam
Dil hai baDee khushee se ise paa.emaal kar
Lekin tire nisaar zaraa dekh-bhaal kar
Itnaa to dil-fareb na tha daam-e-zindagee
Le aa.e aitbaar ke saanche men Dhaal kar
Saaqee mire khuloos kee shiddat ko dekhnaa
Phir aa gaya hoon gardish-e-dauraan ko Taal kar
Ai dost teree zulf-e-pareshaan kee khair ho
Meree tabaahiyon kaa na itnaa khayaal kar
Aayaa hoon yuun bachaa ke havaadis se ziist ko
Laate hain jaise koh se chashma nikaal kar
ThoDe se faasle men bhee haa.el hain laghzishen
Saaqee sambhaal kar mire saaqee sambhaal kar
Ham se 'adam' chhupaao to khud bhee na pee sako
Rakkhaa hai tum ne kuch to suraahee men Daal kar