muskuraa kar khitaab karte ho
— Abdul Hamid Adam
Muskuraa kar khitaab karte ho
Aadaten kyuun kharaab karte ho
Maar do mujh ko rahm-dil ho kar
Kya ye kaar-e-savaab karte ho
Muflisee aur kis ko kahte hain!
Daulaton kaa hisaab karte ho
Sirf ik iltijaa hai chhoTee see
Kya use baaryaab karte ho
Ham to tum ko pasand kar baiThe
Tum kise intikhaab karte ho
Khaar kee nok ko lahoo de kar
Intizaar-e-gulaab karte ho
Ye na.ee ehtiyaat dekhee hai
Aa.ine se hijaab karte ho
Kya zaroorat hai bahs karne kee
Kyuun kaleja kabaab karte ho
Ho chukaa jo hisaab honaa thaa
Aur ab kya hisaab karte ho
Ek din ai 'adam' na pee to kya
Roz shaghl-e-sharaab karte ho
Kitne be-rahm ho 'adam' tum bhee
Zikr-e-ahd-e-shabaab karte ho
Ho kisee kee khushee gar is men 'adam'
Jurm kaa irtikaab karte ho