saaqii sharaab laa ki tabiiat udaas hai

Saaqee sharaab laa ki tabee.at udaas hai Mutrib rubaab uThaa ki tabee.at udaas hai Ruk ruk ke saaz chheD ki dil mutma.in naheen Tham tham ke mai pilaa ki tabee.at udaas hai Chubhtee hai qalb o jaan men sitaaron kee raushnee Ai chaand Doob jaa ki tabee.at udaas hai Mujh se nazar na pher ki barham hai zindagee Mujh se nazar milaa ki tabee.at udaas hai Shaayad tire labon kee chaTak se ho jee bahaal Ai dost muskuraa ki tabee.at udaas hai Hai husn kaa fusoon bhee ilaaj-e-fasurdagee Rukh se naqaab uThaa ki tabee.at udaas hai Main ne kabhee ye zid to naheen kee par aaj shab Ai mah-jabeen na jaa ki tabee.at udaas hai Imshab gurez-o-ram kaa naheen hai koee mahal Aaghosh men dar aa ki tabee.at udaas hai Kaifiyyat-e-sukoot se baDhtaa hai aur gham Qissa koee sunaa ki tabee.at udaas hai Yoonhee durust hogee tabee.at tiree 'adam' Kam-bakht bhuul jaa ki tabee.at udaas hai Tauba to kar chukaa hoon magar phir bhee ai 'adam' ThoDaa saa zahr laa ki tabee.at udaas hai