un ko ahd e shabaab men dekhaa
— Abdul Hamid Adam
Un ko ahd-e-shabaab men dekhaa
Chaandnee ko sharaab men dekhaa
Aankh kaa aitbaar kya karte
Jo bhee dekhaa wo khvaab men dekhaa
Daagh saa maahtaab men paayaa
Zakhm saa aaftaab men dekhaa
Jaam laa kar qareeb aankhon ke
Aap ne kuch sharaab men dekhaa
Kis ne chheDaa tha saaz-e-mastee ko?
Ek sho.ala rubaab men dekhaa
Log kuch mutma.in bhee the phir bhee
Jis ko dekhaa azaab men dekhaa
Hijr kee raat so ga.e the 'adam'
Sub.h-e-mahshar ko khvaab men dekhaa