wo jo tere faqiir hote hain
— Abdul Hamid Adam
Wo jo tere faqeer hote hain
Aadmee be-nazeer hote hain
Dekhne vaalaa ik nahin miltaa
Aankh vaale kaseer hote hain
Jin ko daulat haqeer lagtee hai
Uff! wo kitne amiir hote hain
Jin ko qudrat ne husn bakhshaa ho
Qudratan Kuch shareer hote hain
Zindagee ke haseen tarkash men
Kitne be-rahm tiir hote hain
Wo parinde jo aankh rakhte hain
Sab se pahle asiir hote hain
Phuul daaman men chand rakh liije
Raaste men faqeer hote hain
Hai khushee bhee 'ajeeb shai lekin
Gham baDe dil-pazeer hote hain
Ai 'adam' ehtiyaat logon se
Log munkir-nakeer hote hain