ek aaiina ruu ba ruu hai abhii
— Ada Jafarey
Ek aa.eena roo-ba-roo hai abhee
Us kee khushboo se guftugoo hai abhee
Vahee khaana-ba-dosh ummeeden
Vahee be-sabr dil kee khoo hai abhee
Dil ke gunjaan raaston pe kaheen
Teree aavaaz aur too hai abhee
Zindagee kee tarah khiraaj-talab
Koee darmaanda aarzoo hai abhee
Bolte hain dilon ke sannaaTe
Shor saa ye jo chaar-soo hai abhee
Zard patton ko le ga.ee hai havaa
Shaakh men shiddat-e-numoo hai abhee
Varna insaan mar gayaa hotaa
Koee be-naam justujoo hai abhee
Ham-safar bhee hain rahguzar bhee hai
Ye musaafir hee koo-ba-koo hai abhee