aankhon men aansuon ko ubharne nahiin diyaa

Aankhon men aansuon ko ubharne naheen diyaa MiTTee men motiyon ko bikharne naheen diyaa Jis raah par paDe the tire paanv ke nishaan Is raah se kisee ko guzarne naheen diyaa Chaahaa to chaahaton kee hadon se guzar ga.e Nashsha mohabbaton kaa utarne naheen diyaa Har baar hai nayaa tire milne kaa zaa.iqa Aisaa samar kisee bhee shajar ne naheen diyaa Ye hijr hai to is kaa faqat vasl hai ilaaj Ham ne ye zakhm-e-vaqt ko bharne naheen diyaa Itne baDe jahaan men jaa.egaa too kahaan Is ik khayaal ne mujhe marne naheen diyaa Saahil dikhaa.ee de to rahaa thaa bahut qareeb Kashtee ko raasta hee bhanvar ne naheen diyaa Jitnaa sakoon milaa hai tire saath raah men Itnaa sukoon to mujhe ghar ne naheen diyaa Is ne hansee hansee men mohabbat kee baat kee Main ne 'adeem' us ko mukarne naheen diyaa