bas koii aisii kamii saare safar men rah gaii

Bas koee aisee kamee saare safar men rah ga.ee Jaise koee chiiz chalte vaqt ghar men rah ga.ee Kaun ye chaltaa hai mere saath be-jism-o-sadaa Chaap ye kis kee miree har rahguzar men rah ga.ee Goonjte rahte hain tanhaa.ee men bhee deevaar-o-dar Kyaa sadaa us ne mujhe dee thee ki ghar men rah ga.ee Aur to mausam guzar kar jaa chukaa vaadee ke paar Bas zaraa see barf har sookhe shajar men rah ga.ee Raat dariyaa men phir ik sho.ala saa chakraataa rahaa Phir koee jaltee huee kashtee bhanvar men rah ga.ee Raat bhar hotaa rahaa hai kin khazaanon kaa nuzool Motiyon kee see jhalak har barg-e-tar men rah ga.ee LauT kar aa.e na kyuun jaate hue lamhe 'adeem' Kyaa kamee meree sadaa-e-be-asar men rah ga.ee