dard hote hain kaii dil men chhupaane ke liye
— Adeem Hashmi
Dard hote hain ka.ee dil men chhupaane ke liye
Sab ke sab aansoo naheen hote bahaane ke liye
Umr tanhaa kaaT dee va.ada nibhaane ke liye
Ahd baandhaa thaa kisee ne aazmaane ke liye
Ye qafas hai ghar kee zebaa.ish baDhaane ke liye
Ye parinde to naheen hain aashiyaane ke liye
Kuchh diye deevaar par rakhne hain vaqt-e-intizaar
Kuchh diye laayaa huun palkon par jalaane ke liye
Vo ba-zaahir to milaa thaa ek lamhe ko 'adeem'
Umr saaree chaahiye us ko bhulaane ke liye
Log zer-e-khaak bhee to Duub jaate hain 'adeem'
Ik samundar hee naheen hai Duub jaane ke liye
Too pas-e-khanda-labee aahon kee aavaazen to sun
Ye hansee to aa.ee hai aansoo chhupaane ke liye
Koee gham ho koee dukh ho dard koee ho 'adeem'
Muskuraanaa paD hee jaataa hai zamaane ke liye