gam hai vahiin pa gam kaa sahaaraa guzar gayaa
— Adeem Hashmi
Gham hai vaheen pa gham kaa sahaaraa guzar gayaa
Dariyaa Thahar gayaa hai kinaara guzar gayaa
Bas ye safar hayaat kaa itnee see zindagee
Kyuun itnee jaldee raasta saaraa guzar gayaa
Vo jis kee raushnee se chamaknaa thaa bakht ko
Kis aasmaan se vo sitaara guzar gayaa
Kyaa zikr us ghaDee kaa kaDee thee ki sahl thee
Jo vaqt jis tarah bhee guzaaraa guzar gayaa
Tafheem-e-dostee men baDee bhuul ho ga.ee
Phir duur se hee dost hamaaraa guzar gayaa
Kar ke yaqeen phir se ki main mushkilon men huun
Thahraa naheen vo shakhs dobaara guzar gayaa
Ik vaqt khush-naseeb saa aayaa to thaa 'adeem'
Maddham see ik sadaa men pukaaraa guzar gayaa
Mujrim huaa thaa aankh jhapakne kaa main 'adeem'
Jo zehn men basaa thaa nazaara guzar gayaa