ik khilaunaa tuut jaaegaa nayaa mil jaaegaa

Ik khilaunaa TuuT jaa.egaa nayaa mil jaa.egaa Main naheen to koee tujh ko doosraa mil jaa.egaa Bhaagtaa huun har taraf aise havaa ke saath saath Jis tarah sach-much mujhe us kaa pataa mil jaa.egaa Kis tarah rokoge ashkon ko pas-e-deevaar-e-chashm Ye to paanee hai ise to raasta mil jaa.egaa Ek din to khatm hogee lafz o maa'nee kee talaash Ek din to mujh ko meraa mudda'aa mil jaa.egaa Ek din to apne jhooTe khol ko toDegaa vo Ek din to us kaa darvaaza khulaa mil jaa.egaa Jaa rahaa huun is yaqeen se us ke chhoDe ghar kee samt Jaise vo baahar galee men jhaanktaa mil jaa.egaa ChhoD khaalee ghar ko aa baahar chalen ghar se 'adeem' Kuchh naheen to koee chehra chaand saa mil jaa.egaa Tez hotee jaa rahee hain dhaDkanen aise 'adeem' Jaise agle moD par vo be-vafaa mil jaa.egaa