ik pal bagair dekhe use kyaa guzar gayaa
— Adeem Hashmi
Ik pal baghair dekhe use kyaa guzar gayaa
Aise lagaa ki ek zamaana guzar gayaa
Sab ke liye buland rahe haath umr bhar
Apne liye duaaon kaa lamha guzar gayaa
Koee hujoom-e-dahr men kartaa rahaa talaash
Koee rah-e-hayaat se tanhaa guzar gayaa
Milnaa to khair us ko naseebon kee baat hai
Dekhe hue bhee us ko zamaana guzar gayaa
Dil yuun kaTaa huaa hai kisee kee judaa.ee men
Jaise kisee zameen se dariyaa guzar gayaa
Is baat kaa malaal bahut hai mujhe 'adeem'
Vo mere saamne se akelaa guzar gayaa
Ham dekhne kaa Dhang samajhte rahe 'adeem'
Itne men zindagee kaa tamaashaa guzar gayaa
Baaqee bas ek naam-e-khudaa rah gayaa 'adeem'
Sab kuchh bahaa ke vaqt kaa dariyaa guzar gayaa