jab bayaan karoge tum ham bayaan men niklenge
— Adeem Hashmi
Jab bayaan karoge tum ham bayaan men niklenge
Ham hee daastaan ban kar daastaan men niklenge
Ishq ho mohabbat ho pyaar ho ki chaahat ho
Ham to har samundar ke darmiyaan men niklenge
Raat kaa andheraa hee raat men naheen hotaa
Chaand aur sitaare bhee aasmaan men niklenge
Dekh to kabhee shab ko kaarvaan sitaaron kaa
Nuur ke ka.ee mahmil kahkashaan men niklenge
Boliyaan zamaane kee mukhtalif to hotee hain
Lafz pyaar ke lekin har zabaan men niklenge
KaaT kar badan saaraa qaash qaash men jhaanken
Aap ke hayoole hee qalb-o-jaan men niklenge
Khaak kaa samundar bhee kyaa ajab samundar hai
Is jahaan men Doobenge us jahaan men niklenge
Qissa-e-sukhan-goee jab 'adeem' aa.egaa
Ham bhee vaaqi.a ban kar daastaan men niklenge
Sirf sabz patte hee peD par naheen hote
Kuchh na kuchh parinde bhee aashiyaan men niklenge