kis havaale se mujhe kis kaa pataa yaad aayaa
— Adeem Hashmi
Kis havaale se mujhe kis kaa pataa yaad aayaa
Husn-e-kaafir ko jo dekhaa to khudaa yaad aayaa
Ek TuuTaa huaa paimaan-e-vafaa yaad aayaa
Yaad aayaa bhee mujhe aaj to kyaa yaad aayaa
Shaam ke haath ne jis vaqt lagaa lee mehndee
Mujhe us vaqt tiraa rang-e-hinaa yaad aayaa
Kaheen aankhon kee namee raaz na ifshaa kar de
Main ne munh pher liyaa too jo zaraa yaad aayaa
Saare fankaar uThaa laa.e the shahkaaron ko
Aur main thaa mujhe andaaz tiraa yaad aayaa
Kitnee duniyaa thee mire gird tujhe kyaa ma.aloom
BaDee mushkil se mujhe teraa pataa yaad aayaa
Tere daaman men namee itnee ziyaada kyuun hai
Kaun saa phuul tujhe baad-e-sabaa yaad aayaa
Jab kisee ko koee ummeed vafaaon kee na thee
Mujhe us pal tiraa paimaan-e-vafaa yaad aayaa
Qadam uThte the kahaan soo-e-haram apne 'adeem'
Aaj mushkil nazar aa.ee to khudaa yaad aayaa