kisii jhuutii vafaa se dil ko bahlaanaa nahiin aataa
— Adeem Hashmi
Kisee jhooTee vafaa se dil ko bahlaanaa naheen aataa
Mujhe ghar kaaghazee phoolon se mahkaanaa naheen aataa
Main jo kuchh huun vahee kuchh huun jo zaahir hai vo baatin hai
Mujhe jhooTe dar-o-deevaar chamkaanaa naheen aataa
Main dariyaa huun magar bahtaa huun main kohsaar kee jaanib
Mujhe duniyaa kee pastee men utar jaanaa naheen aataa
Zar-o-maal-o-javaahir le bhee aur Thukraa bhee saktaa huun
Koee dil pesh kartaa ho to Thukraanaa naheen aataa
Parinda jaanib-e-daana hamesha uD ke aataa hai
Parinde kee taraf uD kar kabhee daana naheen aataa
Agar sahraa men hain to aap khud aa.e hain sahraa men
Kisee ke ghar to chal kar koee veeraana naheen aataa
Huaa hai jo sadaa us ko naseebon kaa likhaa samjhaa
'adeem' apne kiye par mujh ko pachhtaanaa naheen aataa