koii patthar koii guhar kyuun hai
— Adeem Hashmi
Koee patthar koee guhar kyuun hai
Farq logon men is qadar kyuun hai
Too milaa hai to ye khayaal aayaa
Zindagee itnee mukhtasar kyuun hai
Jab tujhe lauT kar naheen aanaa
Muntazir meree chashm-e-tar kyuun hai
Us kee aankhen kaheen sadaf to naheen
Us kaa har ashk hee guhar kyuun hai
Raat pahle hee kyuun naheen Dhaltee
Teergee shab kee taa-sahar kyuun hai
Ye bhee kaisaa azaab de Daalaa
Hai mohabbat to is qadar kyuun hai
Too naheen hai to roz-o-shab kaise
Shaam kyuun aa ga.ee sahar kyuun hai
Kyuun ravaana hai har ghaDee duniyaa
Zindagee mustaqil safar kyuun hai
Main to ik mustaqil musaafir huun
Too bhalaa meraa ham-safar kyuun hai
Tujhe milnaa naheen kisee se 'adeem'
Phir bichhaDne kaa tujh ko Dar kyuun hai